تأثر القلب بوجود الميكروب السبحي

 تأثر القلب بوجود الميكروب السبحي

 ناس كتير فاهمه ان الميكروب السبحي لما بيتواجد على اللوزتين ولا يتم علاجه او تشتد الإصابه به يبدأ في الإنتشار ومهاجمة أماكن أخرى غير اللوزتين و أشهرها القلب و الغضاريف.
 الحقيقه ان المعلومه دي عارية تماما من الصحه فالميكروب لا يهاجم او ينتقل لإصابة هذه الأماكن وانما ما يحدث هو تحت بند الأمراض المناعيه
Autoimmune diseases
طيب ايه اللي بيحصل بالظبط
 احنا طبعا عارفين ان علشان الجهاز المناعي يقوم بإنتاج أجسام مضاده لشئ معين لابد وان يرى الجهاز المناعي هذا الشئ ويعتبره جسم غريب لأول مره يراه ومن ثم يقوم بإنتاج الأجسام المضاده الخاصه بهذا الشئ ومعنى أنها خاصه به اي أنها مصممه خصيصا لمهاجمة جزء معين منه لإضعافه والقضاء عليه ( أقصد جزء في تكوينه البيولوجي )
طيب كده تمام اوي
لسه بردو معرفناش ايه بقى علاقة الميكروب السبحي بصمامات القلب او بالغضاريف ؟؟؟
طيب حاضر هقولك اهو
الأجسام المضاده التي يتم إنتاجها من الجهاز المناعي تقوم بمهاجمة
Group A streptococcal antigens
 و اللي هي عباره عن ايه

N-acetyl-glucosamine & M protein
تمام اوي
ايه بقى علاقة ده بالقلب
قالك بقى فيه حاجه اسمها
autoantigen cardiac myosin
و دي حاجه طبيعيه موجوده على صمامات القلب بشكل طبيعي و اللي وجدوا انها شبيهه تماما ل
M protein
 الخاص بالميكروب

are similar enough to host proteins that they can stimulate existing B and T cells to respond to self proteins.
طيب ايه اللي يحصل بقى ؟؟؟؟؟
بالظبط الله ينور عليك
 الأجسام المضاده تهاجم الميكروب و كمان تهاجم الأنتيجين الموجود بشكل طبيعي على صمامات القلب نظرا للتشابه الكبير بينهم و بالتالي يؤدي الى أمراض القلب
 يعني من الآخر كده الميكروب نفسه مش هو اللي بيروح يهاجم القلب او يعيش على الصمامات ولا هو اللي بيعمل المشكله بذات نفسه وانما الأجسام المضاده التي يتم إنتاجها لمهاجمته هي التي تقوم بهذا الدور مسببة المرض
 علشان كده احنا بنعالج الميكروب ( باستخدام البنسلين ) علشان نوقف إنتاج الأجسام المضاده وبالتالي يتوقف مهاجمتها لصمامات القلب.
لو فيه اي تعليق او ملحوظه اتفضلوا
 فيه بحث في اول تعليق بيتكلم بشكل من التفصيل عن ايه بقى اللي بيحصل من اول مهاجمة الأجسام المضاده لأنتيجين القلب لآخر تأثر الصمام وحدوث المرض